Den norske teikneseriehelten ingeniør Knut Berg reiste allereie på 1950-talet til den framande planeten Kandella, som var på trugande kollisjonskurs med jorda. Inspirert av tiårets store interesse for romfart gav teiknaren Jostein Ragnvald Øvrelid (Ronald Stone) norske lesarar eit bilete av det store, ukjende verdsrommet.

Korleis visualiserer ein framtida? Kva utfordringar står ein framfor når ein skal teikne eit science fiction-univers? Teikneserieskaparane Kristian Hammerstad og Sigbjørn Lilleeng har båe arbeidd med science fiction-sjangeren i bøker som Trigrammaton (Hammerstad) og Mellom planeter (Lilleeng). No møter dei Erle Marie Sørheim for å snakke om science fiction og teikneserieformatet. 

ARRANGEMENTET ER DEL AV SATSINGA «FANTASTISKE FREMTIDER»

I ei verd som til forveksling liknar fortidas science fiction, vil Nasjonalbiblioteket det neste halve året tematisere og diskutere førestillingane om dei fantastiske framtidene, både frå fortida og frå vår eiga samtid. Dei fantastiske forteljingane si historie i Noreg blir trekte opp i ei stor science fiction-utstilling, og gjennom eit omfattande program med publikumsarrangement og fagseminar blir framtidsvisjonar i kulturhistoria og vitskapen diskutert. Saman med Stanford University Library arrangerer Nasjonalbiblioteket i desember den fyrste internasjonale konferansen om kunstig intelligens og maskinlæring i biblioteksektoren. 

Les meir på nb.no: https://www.nb.no/artikler/fantastiske-fremtider/

HUGS AT DU KAN SIKRE DEG GRATISBILLETTAR TIL NASJONALBIBLIOTEKETS ARRANGEMENT. SJÅ BILLETTLENKJE.